Pa medio di e comunicado aki nos kier informa e resultado di nos proyecto y con nos alumnonan a experencia e viahe pa Pereira y muy en particular con nan a haya e estadia na e finca. E resultado ta basa riba un encuesta cu nos a haci bou di 80 alumno.
Na prome luga nos kier a splica cu e meta cu e team di Havo 4 proyecto tabata tin pa e aña aki, cu ta concerni e viahe educativo a wordo presenta den e foyeto di informacion na e mayornan aña pasa 2017 y riba e anochi informativo na maart 2018, unda mayornan a presencia un anochi informativo tocante e biahe na scol. Nos meta e aña aki tabata pa prepara e alumno mas miho pa su futuro como studiante y nos a busca un luga di alohamento unda nos alumnonan ta drumi den camber cu mas alumno en bes cu nan ta dos persona den un camber (manera ta e caso aña pasa). Esaki tabata un decision pa e alumno por comparti y socialisa mas cu otro (logicamente mucha muhernan apart di e mucha hombernan). Un otro meta di e proyecto e aña aki tabata pa e alumnonan cushina den grupo bou guia di docentenan y tour guides certifica (cu green card). P’esey a opta pa keda na e finca aki. Den e graficonan aki bou nos kier a presenta e resultado di e encuesta:
Segun nos encuesta nos por deduci cu nos a logra nos meta bou di e studiantenan.
Nos kier a presenta aki bou mas dato di e encuesta haci, di e experencia cu nos alumno tabata tin na Pereira:
E resultado di e biahe y e operador di tour di escogencia tabata positivo.
Recientemente a sali un comunicado di Colombian Adventures den prensa na Aruba y nos kier a duna e version corecto. Aña pasa nos a bay cu e tour operator Colombian Adventures situa na Wayaca na Aruba y cu lasonan na Pereira. Nos alumnonan tabata tin un bon y dushi experencia cu e operador di tour menciona, segun nos encuesta haci aña pasa.
Sinembargo, e oferta di aña pasa tabata caro y solamente a cubri 5 dia. Nos a dicidi pa bay cu otro operador di turismo di Pereira mes, cu tabata mas economico y pa un periodo mas largo, cu tabata di 8 dia. Na e momento cu nos a anuncia esey, lastimamete e operador di Colombia Adventures a haci tur posibel y imposibel pa purba kibra e viahe educativo di 2018 pa nos alumnonan bay Pereira.
Esaki ta encera por ehempel: cu Colombian Adventures pa medio di un abogado di Colombia a bin demanda nos (proyecto educativo di Colegio Arubano) cu nos tin cu cera un deal cu nan bisando cu nos tin un afspraak haci pa 2018. Pero no tabatin ningun contract firma cu nan. E operador a hasta purba pone presion riba nos door di manda e demanda aki pa Minister, ATIA y ATA cu no tin nada di haber cu e biahe. Nos tabata obliga di gasta placa na abogado pa defende nos contra e demanda infunda. Nan a informa e instancianan di Aruba, cu e operador di tour cu nos a scoge lo no tin papel valido pa opera como tourleader y purba crea panico cerca nos. Resultado tabata cu e operador tabatin tur nan papelnan na ordo. Asta nan a menasa cu nan lo exigi pa detene e operador di Colombia. Despues nan a purba di cera e finca ora nos alumnonan tabata na Colombia, tambe sin resultado. E finca tin tur su papelnan na ordo; si esaki no tabata e caso lo nan a cera e finca e aña aki. Cu nan a cera e finca aña pasa ta corecto, pero mester menciona cu e tempo ey e tabata di otro doño
Nos ta lamenta cu Colombian Adventures situa na Aruba y Pereira, pa e motibo cu nos no a scoge nan como nos tour guides (y obviamente lo a perde di gana placa cu nos proyecto) kier a perhudica nos alumnonan di Colegio Arubano, door di purba cera e finca, mientras nos tabata eynan caba of boycotia actividadnan plania; esey ta algo di lamenta. Si nan a logra esaki, nos alumnonan lo a keda riba caya? Nos ta puntra nos mes si nan a pensa riba e consecuencianan cu nan actonan lo tabatin riba e alumnonan. E manera di haci comercio asina no ta acceptabel pa nos y e mayornan.Tur esaki pasobra nos no a scoge Colombian Adventures como operador.
Nos ta compronde cu a asta purba di ofrece e finca 30 % mas placa net den e temporada cu nos lo hospeda na e finca, pa asina nan cancela nos estadia.
Na ningun momento a cera e cushina, manera e alcaldia di Pereira ta vocifera: ora nan a haci nan control, e finca tabata den bon estado. Berdad un dia coriente a bay, pero esey tabata den henter e bario y e siguiente dia e coriente a bolbe bek.
Cu nos alumnonan mester a cana hopi pa yega na e busnan, tampoco ta berdad. Nan mester a cana apenas 15 meter. Nos tur sa cu movecion ta bon pa salud.
Nos alumnonan y nan mayornan a paga basta placa pa e biahe educativo aki, nos a come na restuarant, nos a paga pa entradanan di e actividadnan, nos a paga pa e transporte di bus, nos a haci compras na supermercado, nos muchanan a cumpra na Mall, pues cu otro palabra e ciudad di Pereira a beneficia economicamente di e viahe aki.
Na ningun momento a daña nomber di Pereira, alcontrario nos muchanan a haya aprecio pa Pereira su naturalesa, buniteza, cultura cu nan y nos no conoce. Un biaha mas danki na e instancianan gubernamental Colombiano cu si a kere den e proyecto y a sostene nos cu nos alumnonan di Havo 4, cu a resulta den un experencia inolvidabel.
Nos ta lamenta cu nos mester a busca abogado pa defende nos proyecto djis pasobra Colombian Adventures no kier a acepta nos desicion di scoge un otro operador. Nunca nos a haya un trato asina di un operador. Nos ta spera cu e relato aki, tur hende por sa awo e informacion corecto. Nos di Havo 4 team lo no reacciona mas riba cualkier articulo cu sali di Colombian Adventures situa na Aruba o Pereira.
Por ultimo nos kier a gradici e operador di turismo na Pereira (ITS colombia) pa nan profesionalismo.
Nos kier a gradici e compania di transporte (G3-Travel), e universidad di Pereira UTP y muy en particular e sosten di e oficina di turismo na Pereira y di e gobernador di Pereira pa e invitacion y e experencia brinda na nos alumnonan.
Mil Gracias !!
