Dos alumno ta pasa pa e di dos tanda: Colegio Arubano ta score den BIOLOGIE-OLYMPIADE 20202020/03/01

 

E studiantenan Ferghall Vlaun y Charissa Wolff den VWO-6 di Colegio Arubano ta dos di e 150 participantenan cu ta pasa pa di dos ronda di Nederlandse Biologie Olympiade (NBO). Un total di 7.986 alumno, procedente di 266 scol, a participa na e prome ronda. Colegio Arubano ta un di e dos scolnan, pafo di Hulanda, cu a participa.

 

Pa 30 aña caba ta organisa e Nederlandse Biologie Olympiade (NBO), cu ta un sorto di ‘Campeonato den Biologia’. Desde 2016 Colegio Arubano ta participa na esaki. Den dos buelta na scol, e alumnonan ta traha riba tareanan por escrito y practico. E ganadonan ta pasa pa e Olimpiada Internacional di Biologia, cu lo tuma luga e aña aki na Hapon. Pa Onderbouw (te cu 3de klas), a organisa un Biologie Olympiade Junior. E alumnonan Faith Felicia di HAVO-3 y Angelie Farro di VWO-3 a resulta e miho candidatonan di e Olimpiada aki.



 

Planta, herencia biologico (genetica) y ecologia
E preguntanan den e prome buelta ta di indole general. Ta trata di preguntanan tocante planta, biokimica y microbiologia te cu herencia biologico (genetica) y ecologia. E docentenan mester a controla e trabou y manda un scan di e miho 5 alumnonan di cada klas of grupo.
E di dos buelta ta di 6 te cu 10 di april, y lo consisti di planta. E participantenan mester haci un prueba por escrito na scol y sigui un dia di estudio na Vrije Universiteit Amsterdam. E alumnonan ta prepara nan mes pa e prueba pa medio di e studiebundel “Planten en zo”.

Hall of fame di Biologia
E alumnonan di Colegio Arubano cu a participa na e Olimpiada a haya un potret elabora den e NBO-poster. Un copia di e poster aki ta colga den e “Biology Hall of fame” di Colegio Arubano. Tambe nan lo haya un mata di aloe den un Colegio-mok, como muestra di ta un ‘Colegiano’ y motivacion pa sigui cu plantamento mas berde na un manera creativo.