COLEGIO ARUBANO TA DUNA ENSEÑANSA A DISTANCIA2020/04/02

 

Pa motibo di e Coronacrisis scol ta cera pa dos siman caba. Sinembargo, esaki no ta nifica cu no ta duna enseñansa. Colegio Arubano a saca probecho di e crisis, pa dal un paso grandi den digitalisacion di les, prueba y examen di scol: enseñansa a distancia.

Normalmente, un rato prome cu shet’or y mey di mainta, un cantidad di 1600 alumno n’ey ta cana riba plenchi di scol rumbo pa e localnan. Awo plenchi di scol ta bashi, y ta reina un silencio surrealistico. Paden, te algun dia pasa, un grupo chikito di directiva di scol y personal administrativo, na e distancia prescribi di 2 meter for di otro, tabata traha riba e medidanan pa organisa actividad escolar na un otro manera.

Bon finalisacion di aña escolar 2019-2020
E retonan ta enorme. Mester finalisa aña escolar na un bon manera. Ainda e candidatonan pa Examen Final mester traha Examen Escolar 3 (SE-3), y e otro alumnonan mester haya debido preparacion, pa e rapport pa bay over. Por lo pronto, e docentenan no por ta presente fisicamente pa trata e materia di les cu e alumnonan. Sigur te cu 19 di april scol ta cera. P’esey, ‘Siña a distancia’ a bira e lema di e periodo nos dilanti.

Influenca riba famia y situacion na cas
Den un carta na tur mayor- y alumnonan di scol, rector di Colegio Arubano, sra. drs. van Loon a skirbi, cu e ta consciente cu e Coronavirus y e medidanan pa combati e virus tin hopi influencia riba famia y situacion na cas. El a haci un apelacion pa cooperacion, comprension y flexibilidad. Den corto tempo scol a adapta enseñansa na e medidanan ‘distanciamento social’ y ‘shelter in place’, cu gobierno a proclama.

Sistema di prueba on-line
E prome pruebanan cu enseñansa a distancia ta positivo. Examen oral pa Hulandes y Ingles di VWO-6 a tuma luga via Google Hangout, mescos a pasa cu e examen oral pa Papiamento di HAVO-5. Mientrastanto e Seccion di ICT a test un sistema di prueba on-line, cu por uza pa e examen- y pruebanan por escrito venidero. Segun experto di ICT y docente Frank van Schuilenburg e ta funciona tecnicamente, pero ainda mester haci un test di capacidad, pa haya sa si e ta traha tambe cu grupo grandi. Grupo grandi na Colegio Arubano kier men, por ehempel, un prueba di Ingles na nivel di HAVO-4: 310 alumno y pa CB2: 251 alumno. Pronto lo bay haci e test aki, pasobra Colegio Arubano no ta descurasha ni entrega door di e Coronacrisis.

Innovacion di Enseñansa
Den e klasnan cu no tin examen, enseñansa on-line tambe ta haya un boost tremendo. Directiva di scol a suministra tur docente un manual yen di tip, cu nan por uza den e estilo nobo di duna les. Den Google Classroom y Magister ta comparti tarea, huiswerk, afspraak, Powerpoint, video, film y otro material pa les. Segun e rooster di cada dia ta trata e lesnan cu e alumnonan na un forma interactivo. Directiva di scol ta consciente cu tin docente cu ta mas versa cu otro. ‘E ta un proceso di aprendisahe, tambe pa e docentenan’, e rector a bisa, ‘den cual nos ta duna nan instruccion pa investiga cua forma ta esun mas adecua pa nan. Pero cu enseñansa, despues di e Coronacrisis nunca mas lo ta mescos cu antes, ta sigur. Netamente riba tereno di digitalisacion nos ta siñando masha hopi. E pandemia ta teribel, pero mi ta sigur cu nos como scol lo sali mas fuerte di esaki.’

Mondeling

Docente di Papiamento, juffrouw Zuleika Silva ta cla pa cuminsa Examen Escolar oral, total 49 alumno.

whatsapp

No obstante e mundo digital cu nos ta biba aden, e contacto humano, principalmente e relacion docente-alumno, no ta reemplasabel pa un mashin